Um JCI Ísland: 

Þann 5. september árið 1960 var haldinn í Þjóðleikhúskjallaranum stofnfundur félags ungra kaupsýslumanna (Junior Chamber of Commerce). Á þessum fundi var ákveðin stofnun félags sem hlaut nafnið Junior Chamber of Iceland. Fyrsta stjórn hreyfingarinnar var skipuð Ingvari Helgasyni sem var formaður og með honum í stjórn voru Hjalti Pálsson, Erlendur Einarsson, Haraldur Sveinsson og Ásmundur Einarsson. Árið 1967 var sögulegt í þróun hreyfingarinnar á Íslandi. Þá var tekin ákvörðun um stofnun aðildarfélaga. Þann 14. september 1967 var stofnað fyrsta aðildarfélagið í Stapanum, þ.e. JC Suðurnes. 10. október sama ár var síðan JC Reykjavík stofnað á hádegisverðarfundi á Hótel Sögu. Stofnun JC Reykjavíkur yfirtók starfsemi þá sem áður var í JC Íslandi. 

Eftir stofnun þessara aðildarfélaga og kosningu stjórna innan þeirra var fyrri stjórn JC Ísland orðin Landsstjórn og sameiningartákn. Á næstu árum fjölgaði aðildarfélögum í hreyfingunni og starfið varð markvissara. Nefndarstarf og verkefni fóru að skila félögunum reynslu og kynningu í þjóðfélaginu. Námskeiðahald í því formi sem við þekkjum í dag hófst árið 1968 með því að Ólafur Stephensen semur ræðunámskeið með aðstoð Richards Sewell félaga í Toastmasters á Keflavíkurflugvelli og var það fyrst haldið í febrúar 1969 hjá Toastmasters og fór það fram á ensku. Í þessi rúmlega 50 ár hefur JCI Ísland veitt félögum sínum þjálfun og reynslu í ræðumennsku, fundarstjórn, fundaritun og verkefnastjórnun. JC félagar á Íslandi tóku þátt í að koma á fót ræðukeppni framhaldsskólanna sem í dag er nefnd MORFÍS. 

Verðlaunin Framúrskarandi ungir Íslendingar sem veitt eru árlega af JCI Íslandi, eru fyrst og fremst hvatningarverðlaun til ungs fólks sem er að takast á við krefjandi og athyglisverð verkefni. Þetta er viðurkenning og hvatning fyrir ungt fólk sem kemur til með að hafa áhrif í framtíðinni. Verkefnið er 20 ára í ár en verðlaunin hafa verið veitt á Íslandi samfellt síðan 2002. Sjá nánar: https://framurskarandi.is/ Verðlaunin eru partur af alþjóðlegri viðurkenningu sem JCI stendur fyrir um allan heim til að vekja athygli á því sem er vel gert og einnig til að hvetja annað ungt fólk til dáða. Erlendis eru verðlaunin nefnd TOYP verðlaun sem stendur fyrir “The Outstanding Young People of the World” 

Í fjölda ára hafa JCI og Nýsköpunarkeppni Grunnskólanna verið í góðu samstarfi. Á hverju ári fær JCI það skemmtilega verkefni að efla færni þátttakenda við að koma hugmyndum sínum á framfæri í ræðuformi. 

JCI er vettvangur til að næla sér í dýrmæta reynslu með virkri þátttöku í starfinu, hrinda í framkvæmd eigin hugmyndum og þeirri þekkingu sem maður hefur aflað sér. 

Alþjóðlegir framkvæmdavaraforsetar frá JCI Íslandi hafa verið: Viktor Ómarsson (2019) og Andrés B. Sigurðsson (1983) Andrés bauð sig fram til heimsforseta 1983. 

Alþjóðlegir varaforsetar frá JCI Íslandi hafa verið: Viktor Ómarsson (2017), Arna Björk Gunnarsdóttir (2009), Bjarni H. Ingibergsson (1998), Lilja Viðarsdóttir (1996), Árni Þór Árnason (1987), Andrés B. Sigurðsson (1982) og Ólafur Stephensen (1971)

Á Landsþingi 2004 var nafni hreyfingarinnar breytt úr Junior Chamber Ísland í Junior Chamber International Ísland og var það gert í takt við önnur aðildarlönd JCI. 

Höfuðstöðvar Junior Chamber Íslands eru að Hellusundi 3 í Reykjavík. 

Nánar um JCI Ísland á vefnum www.jci.is