Kynningarnámskeið JCI

Haustið er svo sannarlega komið og tími til að opna JCI fyrir mögulegum félögum!

JCI er vettvangur til að sækja fullt af skemmtilegum námskeiðum,  víkka út tengslanetið og ná sér í dýrmæta reynslu með því að hrinda í framkvæmd eigin hugmyndum og þeirri þekkingu sem maður hefur aflað sér.

Ef þú vilt…

… öðlast færni sem nýtist á vinnustaðnum sem og félagslífinu
… kynnast nýju fólki og stækka tengslanetið þitt
… skila betri árangri í hópastarfi, á fundum, við skipulagningu viðburða

Þá ert þú á réttum stað!

Námskeiðið spannar að þessu sinni þrjú kvöld

1. kvöld 29. ágúst – Kynningarkvöld
2. kvöld 5. september – Árangursríkara hópastarf
3. kvöld 12. september – Skipulagning viðburða

Ítarlegri upplýsingar um hvert kvöld fyrir sig:

Kynningarkvöld (Kvöld nr. 1 )

Á fyrsta kvöldinu kynnum við hreyfinguna og þátttakendum gefst tækifæri til að kynnast félögum og fá betri innsýn í starfið. Við segjum frá því hvað það er sem við gerum, af hverju, hvernig og hvað er framundan hjá okkur. Einnig hvernig áhugasamir geti tekið þátt og notið ávaxta starfs okkar.

Jafnframt verða næstu þrjú kvöld kynnt lauslega; Hvað þau ganga út á, hvers má vænta af þeim og hvaða þekkingu/færni þátttakendur mega búast við að öðlast.

Árangursríkt hópastarf (Kvöld nr. 2)

Á þessu námskeiði verða kynnt 5 þrep sem eiga að geta gert hvaða hóp sem er að árangursríku teymi. Við munum skoða hvað það er sem veldur því að sumir hópar vinna illa saman, hvað veldur árekstrum og hvað veldur því að sumir einstaklingar í hópastarfi skila litlu sem engu.

Jafnframt munum við skoða gaumgæfilega hvað það er sem veldur því að sum teymi ná hreint ótrúlegum árangri. Við munum rýna í aðferðafræði, skoða samsetningu hópa út frá persónuleikafræðum og rýna í ólík hlutverk ólíkra einstaklinga í hópastarfi.

Skipulagning viðburða (Kvöld nr. 3)

Hvort sem stefnt er að því að halda lítinn eða stóran viðburð þarf alltaf að huga að skipulagningu eigi vel til að takast. Á þessu námskeiði verður farið ofan í saumana á því sem kallað er „best practises“ þegar á að skipuleggja viðburð, skoða tímaferla og áætlanagerð, hvernig markmið eru skilgreind fyrir mismunandi viðburði, hvernig kynningar og markaðsstarfi er háttað og fleiri mikilvæga þætti í ferlinu. Það er að ýmsu að huga þegar skipuleggja á góðan viðburð, hvort sem það er lítil afmælisveisla eða árshátíð hjá stóru fyrirtæki og munum við sjá hvernig þekking og skilningur á árangursríku hópastarfi og skilvirkum fundarhöldum fléttast hér inn og spilar mikilvæga rullu í undirbúningi og skipulagningu viðburða.

Þátttakendum gefst kostur á að ganga inn í JCI á námskeiðunum og eftir að þeim lýkur. Allir á aldrinum 18-40 ára eru velkomnir að líta við og sitja námskeiðin skilyrðislaust og gjaldfrjálst.

Skráning

Dags. og tími:
29. Aug 2017
20:00 - 22:00

Staður:
JCI Húsið

Hlaða niður viðburð í iCal

Flokkur:

• Námskeið